ಪಶ್ಚಾತ್ತಾಪ

ಕಯ್ಯಲಿ ಚಕಮಕಿಸುತಿಹ ಚಾಕು - ಆಗಿಹುದು ಹರಿತ |

ಮನದಲಿ ಬಡಬಡಿಸುತಿಹ ಇಚ್ಛೆ - ಭರವಾದ ಇರಿತ ||

ಈ ಪರಿಯ ಕ್ರೌರ್ಯವ ಎಸಗುವುದು - ನನ್ನ ಇಂಗಿತ |

ಸಂಚಿನ ಅರಿವಿಲ್ಲದೆ ನೀ ಮಲಗಿರುವೆ - ಚಿಂತಾ-ರಹಿತ ||

ಒಂದು ಕಯ್ಯಲಿ ಹಿಡಿದೆನು ನಿನ್ನ ಶರೀರವ |

ತಡೆಯಲಾರದೆ ಹೋದೆನು ಮನದ ಉದ್ವೇಗವ ||

ತ್ವರಿತದಲಿ ಇರಿದೆನು ನಿನ್ನ ಕೋಮಲ ಹೊಟ್ಟೆಯನು |

ಚಿಮ್ಮಿತು ನಿನ್ನ ನೆತ್ತರು; ನಡುಗಿಸಿತು ನನ್ನ ಕೈಗಳನು ||

ಜೀವದ್ರವವು ಹರಿಯುವುದ ನೋಡಿ ಅದೇಕೋ ಅರಿಯೆ |

ಚಿತ್ತದಿ ಹೊರಹೊಮ್ಮಿತು ಯೋಚನೆ - ನಾ ಮಾಡಿದ್ದು ಸರಿಯೆ? ||

ತಡೆಯಲಾರದೆ ಮನದ ದುಗುಡದ ನಿರ್ಭರ |

ಹರಿಯಿತು ಕಣ್ಣೀರ ಧಾರೆಯ ಮಹಾಪೂರ ||

ಕಂಬನಿ ಇಟ್ಟರೂ, ಇದರಿಂದ ತಗುಲಿತೇ ನನಗೆ ಪಾಪ |

ಅಥವಾ ಮಾಡಿಹ ಕೃತ್ಯಕ್ಕೆ ಇದೇ ದೇವರಿಟ್ಟ ಶಾಪ? ||

ಪಶ್ಚಾತ್ತಾಪದಿ ಕ್ಷಮೆ ಯಾಚಿಸುವೆ - ನನ್ನೀ ನೀರಸ ಸ್ಥಿತಿಯಲ್ಲಿ |

ಹೇ ಸ್ವಾದ-ಭೋಗದ ರಾಣಿ - ನನ್ನ ಮೆಚ್ಚಿನ ಈರುಳ್ಳಿ....... ||

ಈರುಳ್ಳಿ ಹೆಚ್ಚುವಾಗ ನಿಮಗೂ ಈ ರೀತಿ ಅನುಭವ ಆಗಿದ್ದಲ್ಲಿ, ನನಗೆ ಬರೆದು ತಿಳಿಸಿ....... :)